سیلاب زدگان لئی حکومت پنجاب دے اقدامات

2022دا تیجا موسم لنگھیا تے چوتھا سر اتے آ گیا۔ پاکستان بھر وچ سیلاب پاروں تباہ کاریاں عروج تے نیں جہدی وجہ نال عوام سخت بے چین تے پریشان نیں۔ ایس سیلابی صورتحال توں قوم دا ہر طبقہ پریشان اے ۔ انج لگدا ای کہ ساڈا ملک صرف اللہ دی کرم نوازی اتے قائم اے ورنہ ساڈے سیاسی حالات دے نال نال جہڑی سیلابی صورتحال چل رہی اے کسی آفت یا بربادی توں گھٹ نہیں ۔ ملک وچ ایسی سیلابی افراتفری اے کہ غریب تے غریب’ امیر لوک وی ایس صورتحال دا بہت مشکل نال سامنا کر رہے نیں۔ پاکستان دے کئی علاقیاں وچ تشویشناک صورتحال دا سامنا اے جیویں کہ بلوچستان وچ 136 توں ودھ افراد صرف سیلاب دے ریلیاں تے سیلاب دی وجہ نال ہون والے حادثیاں دی نذر ہو گئے نیں تے بارشاں وچ مجموعی طور تے ساڈھے تن سو توں ودھ بندے جاں بحق ہو چکے نیں۔ سیلاب دی زد وچ آن والے بہت سارے علاقے جیویں کہ راجن پور، لسبیلہ، مسگی، کچھی، نوشکی، پنجگور، قلات، کوئٹہ، پیشن تے قلعہ سیف اللہ شامل نیں۔
بہت سارے لوک اپنی زندگیاں دا نذرانہ ہار چکے نیں تے بہت سارے لوک اپنے پیارے گوا چکے نیں۔ ایسے اوکھے ویلے وچ اوہناں اضلاع وچ سیلاب توں متاثرہ خانداناں وچ پنجاب حکومت نے 14 ہزار خیمے تے ہور 23ہزار خانداناں نوں راشن فراہم کیتا اے۔ وزیراعلیٰ پنجاب پرویزالٰہی نے ڈیرہ غازیخان’ راجن پور’ مظفر گڑھ تے میانوالی دے سیلاب متاثرین دے نال دلی افسوس کیتا تے متاثرین لئی مالی امداد دا اعلان کیتا اے۔ پنجاب حکومت نے سیلاب وچ جاں بحق ہون والے افراد دے لواحقین نوں اٹھ لکھ روپے دی مالی امداد دین دا اعلان کیتا اے جہناں دے گھر مکمل تباہ ہو گئے اوہناں نوں چھ لکھ روپے فی کس دے حساب نال دتے جان گے جد کہ جزوی طور تے تباہ ہون والے گھراں دے مالکان نوں چار لکھ امداد دتی جاوے گی۔
سیلاب دی زد وچ آ جان نال بہت جانی
نقصان ہویا اے تے ایہدے نال نال مالی نقصان وی ہویا اے۔ لوکاں دے کاروبار تباہ ہو گئے نیں۔ کساناں دی فصلاں پوری طرح تباہ ہو گئیاں نیں جہناں وی علاقیاں وچ کھیتی تے کاشتکاری ہوندی سی اوتھے دے حالات شدید خراب نیں۔ لائیو سٹاک دا وی کافی نقصان ہویا اے۔ لوکاں دے مویشی بہہ گئے نیں۔ سیلاب دی وجہ نال ہون والے نقصانات ایسے تے نہیں جہناں دا پوری طرح ازالہ کیتا جا سکے۔
جدوں پاکستان وچ مون سون شروع ہوندا اے تے بھارت تے مقبوضہ کشمیر وچ وی ہوندا اے تے شروع توں انج ای ہوندا آیا اے کہ بھارت دریائے چناب وچ اپنا اضافی پانی چھڈ دیندا اے تے ایس واری وی انج ای ہویا اے پانی اوور فلو ہون دی وجہ نال اُچا ہو گیا اے جہدی وجہ نال سیلاب دا خطرہ ہور ودھ گیا اے۔ حکومت نے پنجاب وچ امدادی کیمپس دا بندوبست کر رکھیا اے لیکن حکومت تے محکمہ موسمیات نوں ایس منصوبے اتے ہور کم کرن دی تے حالات نوں مدنظر رکھدے ہوئے تیزی نال کوئی منصوبہ بندی کرن دی لوڑ اے۔
سیلاب دی وجہ نال ایہناں علاقیاں دے لوکاں دے کول پین دا صاف پانی نہیں اے۔ اوہناں نوں مجبوراً گندا سیلابی پانی پینا پے رہیا اے تے جے ایسے طرح چلدا رہیا تے عوام سیلابی پانی پین دی وجہ نال ہیضے تے ایسی مختلف نوعیت دی بیماریاں دا شکار ہو سکدی اے۔ ایہدے نال نال
سیلاب زدگان خوراک دی قلت دا وی شکار نیں۔ بے بسی دی ایس صورتحال وچ اوہ لوک صبر دے سوا کجھ کروی نہیں سکدے۔ سیلاب زدگان وچ جہنے وی بڈھے’ بچے تے خاص طور تے حاملہ زنانیاں نیں اوہناں لئی خاص امداد بھیجی جانی چاہیدی اے۔ میڈیکل کیمپس فراہم کیتے جانے چاہیدے نیں تاں جے ایہہ لوک گھٹ توں گھٹ ایس پاسوں حوصلے وچ رہن کہ جے قدرتی آفات دی وجہ نال اوہناں اتے آزمائش دا ویلا آیا اے تے ایس اوکھی گھڑی وچ حکومت اوہناں دی مدد لئی ہمیشہ اوہناں دے نال اے۔
پنجاب حکومت ولوں نقصانات دے ازالے لئی سروے نوں چھیتی توں چھیتی مکمل کرن دی ہدایات جاری کردتی گئیاں نیں۔سروے دے عمل نوں آسان بنان لئی مقامی نمائندیاں نوں مکمل مدد دی ہدایات جاری کیتی گئیاں نیں۔پنجاب حکومت نے سیلاب زدگان دے گھراں ‘ فصلاں تے مویشیاں دے
نقصان دا تخمینہ لا کے متاثرہ افراد دی مالی معاونت کرن دے احکامات دتے نیں۔ وزیراعلیٰ پنجاب پرویزالٰہی نے متاثرہ علاقیاں وچ سڑکاں دی فوری بنیاداں اتے تعمیرو مرمت شروع کرن دے احکامات دتے نیں۔ وزیراعلیٰ پنجاب چودھری پرویزالٰہی دے احکامات دی روشنی وچ سیلاب متاثرین دی بحالی تے اوہناں نوں امدادی سامان دی فراہمی داعمل بدستور جاری اے۔ اوہناں نے آکھیا کہ میانوالی تے ڈی جی خان ڈویژن دے سیلابی علاقیاں وچ 29فلڈ ریلیف کیمپس قائم کیتے گئے نیں۔ فلڈ ریلیف کیمپس وچ 190 گھراں دے 994 بندے وی موجود نیں۔ فلڈ ریلیف کیمپس وچ موجود سارے افراد نوں تن ویلے دا کھانا’ پین دے صاف پانی سنے علاج معالجے دی سہولتاں بدستور جاری نیں۔ سیلابی علاقیاں وچ ہن تک 31933 افراد نوں علاج معالجے دی سہولتاں فراہم کیتی گئیاں نیں تے سیلاب متاثرین دے جانوراں لئی 6ریلیف کیمپس قائم کیتے گئے نیں جہناں وچ 491 جانور موجود نیں۔ ریلیف کیمپس وچ سیلاب متاثرین دے جانوراں دے چارے دا انتظام وی کیتا جا رہیا اے۔ اوہناں نے آکھیا کہ ہن تک 1,43000 جانوراں نوں بیماریاں توں بچا ئو دی ویکسین لائی جا چکی اے تے 11461 گھراں وچ اک مہینے لئی راشن بیگ تقسیم کیتے جا چکے نیں۔
سانوں محکمہ موسمیات وچ جدت اختیار کرن دی لوڑ اے۔ سیلابی پانی نوں اکٹھا کرن لئی وڈے ڈیم تعمیر ہونے چاہیدے نیں جہدا فیدہ ایہہ ہووے گا کہ اسیں سیلابی آفات توں بچے رہواں گے تے اوہو پانی بجلی بنان وچ کم آ سکدا اے۔ہور ایہہ کہ سانوں اپنے سیلاب زدگان بھین بھراواں دی دل کھول کے مدد کرنی چاہیدی اے۔ اوہناں لئی کیتی جان والی امدادی سرگرمیاں وچ دل کھول کے حصہ لینا چاہیدا اے۔ اوہناں نوں امداد فراہم کرن دی اپنی پوری کوشش کرنی چاہیدی اے تے اوہناں نوں ایس مشکل وقت وچ کلیا نہیں چھڈنا چاہیدا۔ سانوں چاہیدا اے کہ ایس مشکل وقت وچ قوم دا ساتھ دیئے۔