تاپ

سلطان کھاروی

تپ تپ کے چڑھی اے تپ اوہنوں صغریٰ نال پئی تاپ دے تپدی اے
دُھپ لگی اے قہر دی اگ وانگوں لو جاپدی جیبھ پئی سپ دی اے
واجاں ماردی اے جان والیاں نوں واج آئوندی نہیں پئی کھپدی اے
گھڑی گھڑی اُڈیکدی گھڑی کوئی دِن لنگھے نہ رات پئی ٹپدی اے
ڈنگ ماردی سپنی دُوریاں دی گلی گلی پئی لُکدی چھپدی اے
کہڑے حال چ ہوئے گا خورے اصغر؟ سوچ مار چھڑپّے چھڑپدی اے
دَئے خاب چ لوریاں وِیر تائیں دَوے تھاپڑے بالڑی تھپدی اے
آہو آئے گا اکبر ضرور اوڑک آس یاس نوں گھٹدی نپدی اے
کہندی بوہڑ مدینے دے والیا وے نانے پاک دا ناں پئی جپدی اے
ہور روگ نہیں کھاروی کوئی اوہنوں ماری ہوئی اوہ کلی کلپدی اے