ریاست نوں ذمہ داری پوری کرنی ہوئے گی، اسلام آباد ہائیکورٹ

اسلام آباد( پنجابی میڈیا گروپ) ہائی کورٹ نے آکھیا اے کہ بلوچ طلبہ لاپتا کیس حساس معاملہ اے، ریاست نوں اپنی ذمے داری پوری کرنی ہوئے گی۔عدالت نے بلوچ جبری گمشدگی انکوائری کمیشن دی سفارشاں اُتے عمل درآمد دے کیس وچ وفاق ولوں سفارشاں بارے عمل درآمد رپورٹ جمع کران لئی مہلت دی استدعا منظور کردیاں ہویاں آکھیا اے کہ توقع اے وفاقی حکومت کمیشن سفارشاں دے انتظار وچ تحریری آرڈر پاس کرے گی۔اسلام آباد ہائی کورٹ دے جسٹس محسن اختر کیانی نے کیس دی سماعت کیتی، جس وچ ایڈووکیٹ ایمان مزاری عدالت سامنے پیش ہویاں۔ عدالت نے استفسارکیتاکہ کیا وفاقی حکومت کمیشن دیاں سفارشاں اُتے عمل درآمد وچ دلچسپی رکھدی اے یا نہیں ؟ جبری گمشدہ بلوچ طالب علماں بارے رپورٹ وفاقی حکومت ویکھے گی یا عدالت فیصلہ کرے؟ایڈیشنل اٹارنی جنرل نے آکھیاکہ وفاقی حکومت بلکل ایس وچ دلچسپی رکھدی اے۔3،4 اسٹیک ہولڈر ایس وچ شامل نیں۔ جسٹس محسن اخترکیانی نے ریمارکس دتے کہ ایہ انسانی حقوق دی خلاف ورزی دا کیس اے، حساس معاملہ اے۔ عدالت نے وفاقی حکومت توں رپورٹ منگدیاں ہویاں سماعت 14 نومبر تک ملتوی کردتی۔