شیواں تے کرنسی اسمگلنگ پاروں پاکستان دے وجود نوں خطرہ اے، وزیراعظم

اسلام آباد( پنجابی میڈیا گروپ) نگران وزیراعظم انوار الحق کاکڑ نے آکھیا اے کہ اسمگلنگ تے غیر ملکی کرنسی دی غیرقنونی تجارت پاکستان دے وجود لئی خطرہ اے۔سینئر صحافیاں نال غیر رسمی گل بات کردیاں ہویاں اونہاں نے انکشاف کیتا کہ مقامی حکام دی ملی بھگت نال اسمگل شدہ ایرانی تیل دیاں27 ہزار گڈیاں روزانہ غیر قنونی طور اُتے پاکستان وچ داخل ہو رہیاں سن۔ اینہاں گڈیاں دے داخلے لئی متعلقہ ڈپٹی کمشنر نوں سوا لکھ توں ڈیڑھ لکھ روپے فی گڈی رشوت دتی جا رہی سی۔ ڈپٹی کمشنر اسمگلنگ وچ کردار ادا کرن والیاں نوں وی شیئرز دے رہے سن۔اونہاں نے آکھیا کہ ااینہاں گڈیاں دی سرحد پار توں غیر قنونی نقل و حرکت تقریبا بند ہو چکی اے، اگرچہ ا جے تک مکمل طور اُتے ایہ اسمگلنگ نہیں رُکی۔ اونہاں نے آکھیا کہ عسکری تے سول قیادت نے اسمگلنگ خلاف فیصلہ کن مہم شروع کیتی۔ پچھلے3 ورھیاں وچ ایہ ایسی دُوجی مہم اے لیکن ایس وار کریک ڈاون شدید سی۔ ایہ میرا فیصلہ سی کہ ایرانی تیل دی پاکستان اسمگلنگ نوں روکیا جائے جس اُتے پاک فوج نے اہم کردار ادا کردیاں ہویاں وڈھے پیمانے اُتے کریک ڈان شروع کیتا۔وزیراعظم نے ہور آکھیا کہ اگست توں پہلاں ایرانی تیل دی اسمگلنگ نوں بوہت سارے لوگ قنونی سمجھدے سن۔ بے روزگاری نوں بلوچستان وچ اسمگلنگ جاری رہن دی دلیل دتی گئی ۔ جس لئی سرکاری ملازمتاں نوں جان بجھ کے خالی رکھیا گیا۔