نواز شریف لئی دبئی توں پاکستان لئی سپیشل طیارہ بک کروا لیا گیا

لہور(پنجابی میڈیا گروپ)پاکستان مسلم لیگ ن دے قائد و سابق وزیر اعظم نواز شریف دی وطن واپسی لئی دبئی توں پاکستان آن لئی سپیشل طیارہ بک کرا لیا گیا۔ذرائع نے تصدیق کیتی اے کہ نواز شریف جس پرواز نال پاکستان پہنچن گے اوس نوں اُمید پاکستان دا نام دتا جائے گا، سپیشل فلائٹ وچ تقریبا ڈیڑھ سو افراد دی گنجائش اے۔نواز شریف 21 اکتوبر نوں پاکستان جان لئی دبئی توں لیگی کارکناں تے صحافیاں دے نال روانہ ہون گے،خصوصی پرواز دبئی توں اسلام آباد پہنچ کے ادھے گھنٹے بعد لہور لئی اڑان بھرے گی، نواز شریف لہور پہنچ کے مینار پاکستان اُتے جلسے نال خطاب کرن گے۔نواز شریف عمرے دی ادائیگی لئی کل لندن توں سعودی عرب جان لئی روانہ ہون گے، سعودی عرب وچ تقریبا اک ہفتہ قیام دے بعد نواز شریف دی اعلی حکام نال کئی ملاقاتاں طے نیں۔ذرائع مطابق سعودی عرب دا دورہ مکمل کر کے نواز شریف 17 یا 18 اکتوبر نوں دبئی پہنچن گے، نواز شریف دبئی وچ3دن ٹھہرن دے بعد 21 اکتوبر لہور لئی روانہ ہون گے، نواز شریف دی دبئی وچ وی کئی ملاقاتاں طے نیں۔