گنڈاپوردا تے حلیہ ہی ٹک ٹاکر وال اے،مریم نوازبارے گل کرن اُتے عظمی بخاری داجوابی وار

لہور(پنجابی میڈیا)وزیراعلی پنجاب مریم نواز بارے خیبرپختونخوا دے وزیراعلی علی امین گنڈا پور دے تبصرے اُتے جوابی وار کر دیاں ہو یاں عظمی بخاری نے آکھیا اے کہ علی امین گنڈا پور دا تے حلیہ ہی وزیراعلی والا نہیں بلکہ ٹک ٹاکروالا اے۔وزیراطلاعات پنجاب عظمی بخاری نے علی امین گنڈاپور نوں تنقید دا نشانہ بنا ندیاں ہویاںآکھیا کہ اونہاںنوں مریم نواز دی کاپی کر دیاں ہویاں شرم آنی چا ہیدی اے، مریم نواز نے جو آکھیا اوس اُتے عمل کیتا، تہانوں وی روٹی سستی کرن دا یاد کروایا۔بیرسٹرسیف نوںمخاطب کر دیاں عظمی بخاری نے آکھیا کہ تہاڈا صابن سلو اے کیا؟ یاد نہیں کہ صحت کارڈ 2015 وچ نواز شریف نے لانچ کیتا سی،تُسی بھنگ دیاں فیکٹریاں لائیاں سن۔اپنی گل جاری رکھدیاں ہویاں اونہاں نے آکھیا کہ تہاڈی کارکردگی ایہ اے کہ تُسی سوشل ویلفیئر دیاں عمارتاں اُتے قبضہ کر کے اوتھے نشئی ٹھہرائے ہوئے سن۔یاد رہے کہ وزیر اعلی خیبرپختونخوا علی امین گنڈا پور نے وزیراعلی پنجاب اُتے تنقید کر دیاں ہویاں اکھیا سی کہ مریم نواز پنجاب دی ٹک ٹاکر وزیر اعلی نیں، اونہاں دی کارکردگی ٹک ٹاک لئی ہندی اے، مریم نواز عوام دی خدمت کرن ٹک ٹاکر نہ بنن۔