لہور ہائیکورٹ:فواد چودھری دی عبوری ضمانتاںبارے تحریری فیصلہ جاری

لہور(پنجابی میڈیا)لہورہائیکورٹ نے سابق وزیر فواد چودھری دی عبوری ضمانتاں دی درخواست دا تحریری فیصلہ جاری کردتا۔لہور ہائیکورٹ دی جسٹس عالیہ نیلم دی سربراہی وچ 2رکنی بنچ نے 2صفحیاں اُتے مشتمل تحریری فیصلہ جاری کیتا،عدالت نے36کیساں وچ عبوری ضمانت دائرکرن لئی فواد چوہدری نوں 7دناں دی مہلت دے دتی، عدالت نے رجسٹرار آفس نوں درخواست18اپریل نوں چیف جسٹس ساہمنے پیش کرن دا حکم دتا۔عدالت عالیہ دے تحریری فیصلہ وچ لکھیا گیا کہ فواد چودھری دا 7دناں دا ویلا18اپریل توں شروع ہوئے گا، فواد چودھری ویڈیو لنک ذریعے عدالتاں وچ پیش ہون گے، فواد چودھری 36 کیساں وچ ضمانت دیاں درخواستاں دائر کرن گے۔لہور ہائیکورٹ دے تحریری فیصلہ وچ ایہ وی آکھیا گیا کہ رجسٹرار آفس مناسب حکم لئی درخواست چیف جسٹس ساہمنے پیش کرے، فواد چودھری عبوری ضمانتاں وچ ٹھیک 10 وجے ویڈیو لنک اُتے ماتحت عدالتاں وچ پیش ہون گے جدکہ سیشن کورٹ لہور دے ویڈیو لنک ذریعے حاضری لگوان گے۔واضح رہے سابق وزیر فواد چودھری نے مختلف تھانیاں وچ اپنے 36مقدمے درج ہون دے خلاف عبوری ضمانتاں لئی عدالت نال رجوع کر رکھیا سی۔