بھارت دا فیر کلبھوشن بارے عدالتی کاروائی دا حصہ بنن توں انکار

اسلام آباد: کلبھوشن یادیو کیس وچ بھارت نے پاکستان نوں جواب گھل دتا۔ انڈیا نے اک وار فیر عدالتی کاروائی دا حصہ بنن توں انکار کر دتا۔ اسلام آباد ہائی کورٹ وچ گرفتار حاضر سروس را افسر نوں وکیل دین بارے وزارت قنون دی عرضی تے سماعت ہوئی۔ اٹارنی جنرل نے عدالت نوں دسیا کہ بھارت نے کلبھوشن کیس وچ 7ستمبر نوں جواب گھلیا اے جہدے وچ چار بے بنیاد اعتراضات کیتے گئے۔

اٹارنی جنرل آکھیا بھارت نے لندن وچ پریکٹس کرن والے کوئینز کونسل نوں بطور وکیل پیش کرن دی اجازت منگی اے۔ آرڈیننس دے تحت کلبھوشن خود، قونصلر یا نمائندے دے راہیں کاروائی دا حصہ بن سکتا پر بھارت جان بوجھ کے کلبھوشن کیس توں بھج رہیا اے۔

ہن ایہو آپشن رہ جاندا اے کہ سرکار کلبھوشن لئی وکیل مقرر کرے، ریاست تے عدالت دوواں کلبھوشن کیس وچ فیئر ٹرائل نوں یقینی بنانا چاہندیاں نیں۔ چیف جسٹس اطہر من اللہ آکھیاایہ عدالت اپنے طور تے کلبھوشن لئی وکیل مقرر کر سکدی اے؟ عدالت دی معاونت کرو کہ بھارت یا کلبھوشن دی مرضی دے بغیر وکیل مقرر کرن دے کیہ اثرات ہون گے؟ کیہ ایہ کلبھوشن کیس وچ موثر نظرثانی دے قنونی تقاضے پورے کرے گا؟ بھارت تے کلبھوشن وکیل نہیں کردے تے کیس کیوں اگے ودھائیے؟ عدالت نے اٹارنی جنرل تے عدالتی معاون حامد خان نوں دلائل تے بین الاقوامی عدالتی نظیراں پیش کرن دی ہدایت کردیاں ہور سماعت 9نومبر تک ملتوی کر دتی۔