پنجاب دا بجٹ مایوس کن تے عوام دشمن اے: اپوزیشن لیڈر حمزہ شہباز

لہور: پنجاب اسمبلی وچ اپوزیشن لیڈر حمزہ شہباز نے بجٹ نوں رد کردیاں عوام لئی مایوس کن قرار دے دتا جد کہ صوبائی وزیر میاں اسلم اقبال دی تقریر دے دوران لیگی رکن عظمیٰ بخاری سیخ پا ہو گئیاں۔ پنجاب اسمبلی دا اجلاس 2گھنٹے 10منٹ دی تاخیر نال شروع ہویا جہدے وچ اپوزیشن لیڈڑ حمزہ شہباز نے بحث دا آغاز کردیاں بجٹ نوں عوام دشمن قرار دتا۔ اوہناں دا کہنا سی نیب تے معیشت اکٹھیاں نہیں چل سکدے، وزیراعظم اسٹے دے پچھے نہ لُکن، فارن فنڈنگ کیس، مالم جبہ تے بی آرٹی دی انکوائری کران، دودھ دا دودھ تے پانی دا پانی ہو جائے گا۔ اوہناں آکھیا سرکار دی ناقص حکمت عملی نال کورونا وائرس تیزی نال پھیلیا، ہن 50ہزار روزانہ ٹیسٹ ہونے چاہیدے نیں۔اسمبلی وچ اظہار خیال کردیاں صوبائی وزیر میاں اسلم اقبال دا کہنا سی معیشت نہ سکھاؤ ایہناں دی ذاتی معیشت خراب ہوئی اے، ہن خانچے تے ٹی ٹیاں بند ہو گئیاں نیں، ایہ دس کہ چینی دی ملاں کناں دیاں نیں، 40وچوں 7ملاں اوہناں دیاں نیں، عمران خان دی کوئی مل نہیں اصل وچ چینی چور ایہ نیں۔ میاں اسلم اقبال دی تقریر دے دوران مسلم لیگ ن دی عظمیٰ بخاری سیٹ تے کھڑی ہو کے بولن لگیاں ایہدے تے سپیکر چودھری پرویز الٰہی نے رولنگ دتی کہ ایہ طریقہ ٹھیک نہیں، انج کرنا اے تے باہر چلی جاؤ جہدے تے عظمیٰ بخاری ایوان توں واک آؤٹ کر گئیاں۔