ویکھیا شہر بمبئی

ہتھلی کتاب نِری ہڈ ورتی نہیں اے، ایہہ تاں سیدھ دسدی ہوئی سچائی اے۔ساڈے ہزاراں معصوم لوک بمبئی دی روشنی وِچ اپنیاں اکھاں چندھیاں کر چکے نیں۔گرچرن سگو نے بڑی دلیری نال اپنے سچ کوڑ نوںساڈے تہاڈے ساہمنے چِٹا ننگا کر کے کھلہار دتا اے۔ اوس دا ایہہ بیانیہ ایس نویں ہنیری دے ور چڑھن توں بچ جان دا اِک لکواںجیہا مشورہ اے۔ایہہ کتاب نِرا پرسچاتاپ نہیں سگوں اِک سچائی دا ہو بہو چِترن اے۔ اوہ سچائی جو کئیاںواسطے نور منارہ بن جاسی۔ لکھیار نے بہت وڈا اپکار کیتا اے سچ لکھ کے۔ انج دِیاں کتاباں چ خورے پنجابی ادب وچ کیہ مقام بن دا اے ایہہ تے پڑھن ہار جان دے نیں۔  (اُلتھا کار: آصف رضا)
کیمرامین شاہ جی ہُن جد وی مدراس توں فلمنگ لئی آوندا تاں اوہ ہوٹل ہی ٹھہردا سی اتے جنے دن شاہ جی ہوٹل وچ ٹھہردا، اونے دن سکھونت وی اوتھے ہی جا ٹکدا۔ ویکھو پلان کیویں اُلٹا ہو گیا۔ شاہ جی نوں سائین کرن ویلے تاں سکھونت نے ایہہ کیہا سی کہ اوہ جد مدراس توں آیا کرے گا تاں اوس دے فلیٹ وچ اوہ ٹھہریا کرے گا پر ہُن جنے دن شاہ جی ہوٹل ٹھہردا سکھونت وی اوتھے شفٹ ہو جاندا۔ پروڈیوسر دے سر 'تے سارا خرچہ جو پینا سی۔
حد ہو گئی سی بے شرمی دی۔
خیر تن چارن دن تاں ہوٹل دے کمرے وچ بیئراں تے چاہاں دے دور وچ فیصلہ ہوندا رہیا کہ گانے نوں فلماونا کیویں ہے تے ایس طرحاں ایہہ سیٹ لاون دی سکیم تیار ہو گئی سی جد کہ ایہناں چیزاں دی پلیننگ بہت پہلاں ہی کر لینی چاہیدی سی۔ 
عام طور 'تے ہوندا ایہہ ہے کہ ایہو جیہے سیٹاں 'تے جتھے جتھے کسے سین نوں فلماونا ہووے، اوہناں تھاواں نوں لوڑ مطابق خوبصورتی نال دلکش بنا لیا جاندا ہے پر باہروں جتھوں کوئی شاٹ نہ لینا ہووے تاں بس پھٹے، بلیاں تے ٹُٹے پُھٹے لکڑاں دے ٹکڑے ہی وکھائی دیندے ہن۔
آرٹ ڈائریکٹر نتن ڈسائی نے اندر کمال دی انٹیریئر کیتی سی پر باہروں اُپر لکھے وانگ لکڑاں دے ٹوٹے ہی نظر آ رہے سن۔ اچانک شاہ جی تے سکھونت دا ارادہ بدلدا ہے تے اوہ ڈانس ڈائریکٹر سروج خان نوں باہروں شاٹ لین لئی وی مجبور کردے ہن جس دا مطلب کہ گھر نوں باہروں خوبصورت کرن وچ میرا اِک لکھ روپیہ ہور لگنا سی۔ تے میں کون ہوندا ہاں ڈائریکٹر تے کیمرا مین دی سوچ 'تے تنقید کرن والا تے ایس طرحاں راتاں دیاں شفٹاں لوا کے دو دن اندرباہروں وی ایس دی ڈیکوریشن کر دتی گئی۔
دُکھ مینوں ایس گل دا سبھ توں ودھ لگا کہ اینا خرچہ باہر لئی کرن دے باوجود اِک سنگل شاٹ وی باہر دا نہیں سی لیا گیا۔ تقریباً تن دن تے تن راتاں لگیاں سن ایس خوبصورت سیٹ نوں تیار کرن لئی۔ میں وی رات نوں بن رہیا سیٹ ویکھن لئی چلے جانا۔ وچارے مزدور پندراں ویہاں فُٹ دی اُچائی 'تے بانساں دیاں بَلیاں 'تے چڑھے رسےّ بنھ رہے ہوندے سن۔ ایہناں دے ننگے پیر ویکھ کے میرا دل کمب اٹھنا کیونکہ کئی واری تاں ایہناں دے پیر پھسل جاندے سن۔ موٹے رسیاں نال بانساں نوں بنھنا۔سٹوڈیو وچ کم کرن والے ایہناں مزدوراں نوں اپنی دیہاڑی بناون لئی بہت ہی سخت محنت کرنی پیندی ہے۔ کنے کنے عالیشان سیٹ بن دے ہن، باہروں لکڑاں ہی لکڑاں تے اندر شیش محل۔ مغلِ اعظم ورگیاں فلماں دے بنائے ہوئے سیٹاں نُوں کون بُھل سکدا ہے۔ اوس وقت لکھاں رُپیاں نال فلماں بندیاں سن تے اج پندراں ویہاں کروڑ اِک ہٹ ہویا ہیرو ہیروئین ہی لے لیندا ہے۔ چھوٹے فلم پروڈیوسراں ہتھوں ہُن فلماں لنگھ کے وڈے وڈے فلمی اداریاں، کارپوریشناں کول آ گئیاں ہن۔ بڑی ہی تبدیلی آ گئی ہے، پچھلے کُجھ سالاں توں بولی وُڈ دی فلمی دنیا وچ۔ اج بولی ووڈ فلم دنیا دا کیہڑا دیش ہے، جتھے نہیں پہنچدی۔ نویں تکنالوجی نال دنیا سُنگڑ کے ہتھ دیاں اُنگلاں 'تے آ گئی ہے۔ 
... تے میں گل کر رہیا ساں اپنی فلم دے سیٹ دی۔ ایس بن رہے سیٹ وچ اِک بڑا ہی خوبصورت بیڈروم بنایا گیا سی، جس وچ جیکی شراف تے ہیروئین نیلم دے کُجھ پیار منظر فلماونے سن۔
گانے دے کُجھ بول کمرے توں شروع کرکے باقی دا گانا آوٹ ڈور فلماونا سی۔
گانے دے بول سن...
ہیلو ہیلو
کچھ تو بولو
کھن کھن کھن کیرے کنگنا
حال بتاوں کسے اپنا
جانے نہ
مانے نہ
اناڑی
سجنا...
ایس گانے دی ڈانس ڈائریکٹر سی فلماں دی اچ کوٹی دی ڈانس ڈائریکٹر سروج خان۔ گانے دے اِک اِک بول اُپر بوڈی دی کیہ موومنٹ کرنی ہے ایہہ سروج خان نیلم نوں سمجھا رہی سی تے میں ویکھ کے حیران ہوئی جا رہیا ساں کہ سروج کیویں فیشیئل ایکسپریشن کرنا دس رہی ہے۔ سروج سریرک پکھوں کُجھ موٹے سریر دی سی پر اوس دا سریر اوویں ہل رہیا سی جیویں اُنی ویہہ سال دی دبلی پتلی کُڑی ہووے۔ 
ایس ہی سروج خان نے سبھاش گھئی دیاں ہٹ فلماں وچ مادھوری دکشت نوں ایسا نچایا کہ اوہ ہر نوجوان دِلاں دی دھڑکن بن گئی سی۔ ایسے طرحاں آئی این. چندرا دی فلم '"تیزاب" جس وچ مادھوری دکشت "'ایک دو تین" گانے وچ موہنی دیاں اداواں وچ انج نچی جیویں اوس نال پورا برہمنڈ نچ رہیا ہووے تے ایس نوں نچاون والی کون سی اوہ سی سروج خان۔ ایس گانے لئی سروج خان نوں فلم فیئر ایوارڈ ملیا سی تے ایہہ پہلی وار سی کہ کسے گانے دی 'کوریوگراف لئی ایڈا وڈا پُرسکار ملیا ہووے۔
ایہہ" 'ایک دو تین" گانا مادھوری لئی اِک جیکپوٹ دی طرحاں ثابت ہویا سی تے اوس پچھے پروڈیوسراں دی لمبی لائن لگ گئی سی تے ایسے طرحاں ہی سروج خان وی فلم انڈسٹری دی نمبر ون ڈانس ڈائریکٹر بن گئی سی۔ایہناں گانیاں نوں کوئی کیویں بُھل سکدا ہے
دھک دھک کرنے لگا... فلم 'بیٹا
چولی کے پیچھے کیا ہے... فلم کھل نائک
چنے کے کھیت میں... فلم 'انجام
میرا پیا گھر آیا... فلم 'یارانہ
ڈولا رے ڈولا... فلم 'دیوداس
تما تما... فلم 'تھانیدار
ہوا ہوائی... فلم 'مسٹر انڈیا
میرے ہاتھوں میں نوں نوں چوڑیاں ہیں... فلم 'چاندنی   (جاری اے)