آکھن لو ک سیانے

بھرم گوایے نہ اپنا’ کوئی نہ دیندا ونڈ
معنے: بھرم: اعتبار٭ونڈ: تقسِیم کر۔
ویروا:مت دِتی گئی اے پئی جدوں بندے تے دِن پے جان تاں اوس نُوں ہر ا،ک جھولی ٹڈ کے اپنا بھرم نہیں گوا لینا چاہیدا۔ ایس لئی پئی منگن گیاں کیڑا اپنی کِسے نُوں اپنی مالکی ونڈ دیندا اے۔
بھریا اوس دا جانِیے’ جِس دا توڑ چڑھے
معنے: بھریا: پانی بھریا۔
ویروا:مت دِتی گئی اے پئی اُنج تاں ہر کوئی عِلم گیان اتے ولایت دی گل کردا پھِردا اے پر جے اوس دی ولایت توڑ چڑھ جاوے تاں اوس نُوں کامیاب سمجھنا چاہیدا اے۔اتے اوہ گل کِتے کِتے بن دی بؤہتے پؤڑی چڑھے وی لہ جاندے نیں۔
بھریا میلا ای چھڈ دینا چاہیدا اے
معنے: بھریا: پورے جوبن وِچ۔
ویروا:مت دِتی گئی اے پئی میلے وِچ گیاں جدوں اوہ پورے جوبن وِچ ہووے تاں چھڈ کے مُڑ آؤنا چاہیدا اے نہیں تاں میلہ اُجڑن سمیں پرتیاں بے سوادی ہو جاندی اے۔کِسے وی کم نُوں بھر جوبن وِچ چھڈ دینا چاہیدا اے اخیر ویکھنا کدی وی چنگا نہیں ہوندا۔
بھریاں بھانڈیاں دیاں گھڑولیِاں ای مان نہیں
معنے:گھڑولِیاں: چھوٹے گھڑے۔
ویروا:مت دِتی گئی اے پئی دؤلت وند گھراں وِچ ہر پاسے دؤلت دی لہر بہر ہوندی اے۔ تگڑے دا صلاحنا کِیہ اتے ماڑے دا کلاہنا کِیہ۔اوہناں گھراں وِچ نِکے گھڑے وی چوکھے مُل والے ای ہوند ے نیں۔
بھڑوے نُوں وی مُونہ تے بھڑوا نہیں کہندے
معنے:بھڑوا: کنجر’ دلال۔
ویروا:مت دِتی گئی اے پئی ہر بندے دی عِزت کرنی ضروری اے اتے بُرے بندے نُوں وی اوسدے سامنے بُرا نہیں آکھنا چاہیدا۔کنجر نُوں وی مُونہ تے کنجر نہیں آکھنا چاہیدا اِنج اگلا ناراض ہو کے کدی نہ کدی نقصان کر سکدا اے۔
٭٭٭