مقبوضہ کشمیر وچ پابندیاں بارے بھارتی سپریم کورٹ نے فیصلہ سنا دتا

نئی دہلی: بھارتی سپریم کورٹ نے مقبوضہ کشمیر وچ پابندیاں بارے کیس وچ فیصلہ سناندیاں آکھیا اختلاف رائے نوں دبان لئی دفعہ 144نوں استعمال نہیں کیتا جا سکدا۔

بھارتی سپریم کورٹ نے پچھلے ورھے 5اگست نوں بھارتی حکومت ولوں آرٹیکل 370دی منسوخی دے بعد مقبوضہ کشمیر وچ کرفیو تے دوجیاں پابندیاں دے نفاذ دے خلاف دائر درخواستاں تے فیصلہ سنا دتا۔ جسٹس این وی رامانا، جسٹس سباش ریڈی تے جسٹس بی آڑ گوائی تے مشتمل تن رکنی بنچ نے 27نومبر نوں محفوظ کیتا جان والا فیصلہ سنایا۔

سپریم کورٹ نے اپنے فیصلے وچ آکھیا کوئی شک نہیں کہ جمہوری نظام وچ اظہار رائے دی آزادی اہم ہوندی اے، اظہار رائے دی آزادی دے تحت انٹرنیٹ تک رسائی بنیادی حقوق وچ شامل اے، اختلاف رائے نوں دبان لئی دفعہ 144نوں استعمال نہیں کیتا جا سکدا، انٹرنیٹ نوں محدود یاں معطل کرن دے احکامات دی عدالتی جانچ ہووے گی۔ خیال رہوے بھارتی سپریم کورٹ وچ مقبوضہ کشمیر وچ پابندیاں بارے کانگریس دے رہنما غلام نبی آزاد تے کشمیر ٹائمز دی ایگزیکٹو ایڈیٹر انورادھا بھاشن تے دوجیاں ولوں درخواستاں دائر کیتی گئیاں سن۔