آکھن لوک سیانے

احسان باجوہ

بھولے بھائ’ نہ پچھو تائ
معنے:پچھوتائ: پچھتائ۔
ویروا:مت دِتی گئی اے پئی بندہ اللہ دے بھروسے تے جو کُجھ وی کردا جاوے اوس نُوں کدی پچھتانا نہیں پَیندا۔سگوں اج ہووے جاں کل اللہ اوسدی ہر مراد اوڑک پوری کر ای دیندا اے۔
بھولے بھائ’ کٹے ای دُدھ چُنگھدے نیں
معنے:چُنگھدے: پِیندے نیں۔
ویروا:مت دِتی گئی اے پئی بندہ جے اپنی مجھ دا دھیان نہیں رکھے گا تاں مجھ نُوں کٹا چُنگھ ای جاوے گا۔جیہڑے شے دی راکھی نی کیتی جاوے تاں نقصان تاں ہون دا ڈر رہندا ای اے۔
بھؤں چؤں کھوتی’ بوہڑ دے تھلھے
ویروا:مت دِتی گئی اے پئی کئی لوک پرت پرت کے اِکو تھانویں ای رہندے نیں۔ اتے کِسے ہور تھاں نہیں جاندے۔اِنج اوہ اپنے مقصد توں چوکھے ای دور رہ جاندے نیں اتے کدی منزل تے نہیں اپڑدے۔
بھولیاں دے کم سمولے
معنے:بھولیاں:سادمرادیاں
ویروا:مَت دِتی گئی اے پئی جو بندہ وی اللہ دے آسرے تے کم چھوہ دیندا اے اوسدا کم اج سؤرے جاں کل رب سچا سوار ای دیندا اے۔اتے اوس نُوں مُراد مِل ای جاندی اے۔
بھوئیں اتے دھیاں والیاں نُوں ہر کوئی پُچھ دا اے
معنے: بھوئیں: زمِین۔
ویروا:مت دِتی گئی اے پئی دھی دا ساک لوک ہر کِسے کولوں پُچھ لَیندے نیں’ ساک دینا نہ دینا گھر والے دی مرضی ہوندی اے۔ایسراں ای زمِین دے مالک کولوں ہر کوئی واہن لئی زمِین تاں پُچھدا ای رہندا اے۔ایس گل تے کوئی اعتراض نہیں کردا اتے ایہ کم جگ اندر چلدا ای رہندا اے۔
بھیڑ بھیڑیے’ کُبھیڑ نہ بھیڑیے
معنے: بھیڑ: لڑائی’ مقابلہ٭ بھیڑیے: لڑیے
ویروا:مَت دِتی گئی اے پئی بندے نُوں ہر کم عقل فِکر نال ای کرنا چاہیدا اے ایتھوں تیکر پئی جے کِتے لڑائی وی لڑنی پے جاوے تاں اوہ وی عقل فِکر والی ای لڑنی چاہیدی اے ‘ مُورکھاں اتے ہوُڑمت لوکاں والی لڑائی نہیں لڑنی چاہیدی۔پئی مگروں زِندگی وِچ بندہ اِکدوجے دے متھے لگن جوگا ای نہ رہوے۔٭٭