آکھن لوگ سیانے

احسان باجوہ

بھَیڑی جُتی سال دا روگ’ بھَیڑی سوانی عُمر دا روگ
معنے:بھَیڑی: بُری۔
ویروا:مت دِتی گئی اے پئی بھَیڑی جُتی جے بندہ بھُلیکھے نال لَے لوے تاں اِک سال تائیں بندے نُوں خراب ہونا پَیندا اے۔سال وِچ جُتی وی ٹُٹ جاندی اے اتے بندے دے پیراں نُوں وی چنڈیاں پا جاندی اے۔ پر جے کوئی کبُدھی اتے مُورکھ زنانی بندے نُوں مِل جاوے تاں اوسدی ساری عُمر ای برباد ہو جاندی اے اتے روندیاں کھوندیاں ای گُذردی اے۔
بھَیڑی خبر’ جھبدے ای اپڑ جاندی اے
معنے:جھبدے: چھیتی۔
ویروا:مت دِتی گئی اے پئی چنگی گل جاں خبر تاں باہرے وِچ بڑی ہؤلی ہؤلی کھِلر دی اے پر بُری گل واہ ورولے وانگربڑی چھیتی لوکاں وِچ اپڑ جاندی اے اتے جِدھر دھیان کرو ہر پاسے ہر مُونہ تے اوہو گل ہوندی اے۔
بھَیڑے بھانڈیوں ‘ سدا بھَیڑی واج ای آؤندی اے
معنے: بھانڈیوں: برتن چوں
ویروا:مَت دِتی گئی اے پئی بُرے بندے دے مُونہ وِچوں کدی وی چنگی آواز نہیں آ سکدی۔اوہ جدوں وی کرے گا کوئی کبُدھی گل ای کرے گا اتے وسیب اندر فساد ای کھلارے گا۔ایس لئی سدا چنگیاں نال ہر اِک نُوں دستما رکھنا چاہیدا اے۔
بھَیڑے رون توں چُپ چنگی
معنے: بھَیڑے: بُرے۔
ویروا:مت دِتی گئی اے پئی ہر کم کِسے چنگے ڈھنگ نال ای کرنا چاہیدا اے۔ ایتھوں تِیک پئی جے چنگے ڈھنگ نال رون دی جاچ نہ ہووے تاں اوس نالوں چُپ ای چنگی ہوندی اے۔تاں جو کوئی چنگا نہیں آکھ سکدا تاں بُرا وی نہ آکھے۔
بھَیڑے نُوں بھَیڑا’ سؤ کوہ دا ولا بھن کے وی مِل پَیندا اے
معنے:ولا بھن کے: ولا پا کے’ اگہوں ہوکے
ویروا:مَت دِتی گئی اے پئی ہر ونک دے لوک اِک دوجے نال مِک کے راضی رہندے نیں۔ بُرے بندے نُوں بُرا بندہ اگہوں وانڈی ستاں کوہاں دا پَینڈا کرکے وی جا مِلدا اے۔ایس لئی پئی دُونہ دا کم اِک جیہا ای ہوندا اے۔اتے بھیڑا بھیڑے نُوں مِل کے ای راضی رہندا اے۔٭