پنجابی یونین دے پربندھ ہیٹھ پنجاب ہاؤس وچ قائد تحریک پنجابی الیاس گھمن دی ورھے گنڈھ دا اکٹھ

لہور (سٹاف رپورٹر) پنجابی یونین دے پربندھ ہیٹھ پنجاب ہائوس وچ قائد پنجابی تحریک چودھری الیاس گھمن دی سالگرہ دے موقعے اتے تقریب داآہر کیتا گیا جہدے وچ زندگی دے وکھووکھ پکھاںنال تعلق رکھن والے اہم لوکاں نے رلت کر کے اوہناں دی پنجابی زبان تے ادب لئی خدمات نوں خراج تحسین پیش کیتا۔ تقریب دی میزبانی چیئرمین پنجابیمیڈیا گروپ مدثر اقبال بٹ نے کیتی۔ تقریب دا باقاعدہ آغاز حافظ ممتاز ملک نے تلاوت کلام پاک نال کیتا جہدے مگروں ندیم اقبال باہو نے صوفیانہ کلام سنا کے خوب داد وصول کیتی۔پروفیسر ڈاکٹر کلیان سنگھ کلیان نے تقریب نال خطاب کردے ہوئے آکھیا کہ کجھ لوک ایسے ہوندے نیں جہناں لئی زبان بولدی اے لیکن کجھ ایسے ہوندے نیں جہناں لئی دل بولدا اے۔ الیاس گھمن اوہو انسان نیں جہناں لئی دل بولدا اے۔ مینوں یاد اے اسیں بچپن توں اوہناں نوں سندے آ رہے آں۔ اوہناں دی کتاباں تے گلاں توں بہت کجھ سکھن نوں ملیا۔ اوہناں نے پنجابی وچ سائنسی کہانیاں وی لکھیاں نیں جہڑی آن والی نسل لئی اثاثہ نیں۔مدثر اقبال بٹ دا آکھنا سی کہ جوانی دے دور توں ای اسیں جدوں وی پنجابی زبان دی گل سنی تے سب توں پہلاں الیاس گھمن دا ذکر ہویا۔ مینوں پنجابی دی تحریک وی اوہناں کولوں ملی تے اجے تک اوہناں دے زیر سایہ کم کر رہیا آں۔ میں سمجھنا واں کہ اوہناں دا 40سالاں دا جہڑا پنجابی لئی کم اے کوئی ہور اینا کر ای نہیں سکدا۔ اوہناں نے پنجابی لئی جیلاں وی بھگتیاں لیکن اپنے مشن توں پچھے نہیں ہٹے۔ ساڈی دعا اے اللہ تعالیٰ اوہناں نوں لمی حیاتی دیوے۔ ایسے طرح ساڈی قیادت کردے رہن۔مشتاق قمر نے گل کردیاں ہوئیاں آکھیا کہ سب توں پہلاں الیاس گھمن نوں دل و جان نال سالگرہ دی بہت مبارک۔ میرا اوہناں نال تعلق یونیورسٹی دے دور توں اے فیر اوہناں نے سجن اخبار تے فیر رویل کڈیا۔ ایہہ ایسے ادارے نیں جہناں توں پاکستان تے پاکستان توں باہر وی بہت پنجابی سیوک پیدا ہوئے۔ جدوں تک الیاس گھمن تے مدثر بٹ جئے لوک موجود نیں ایہہ زبان تے دھرتی قائم رہوے گی۔ندیم رضا نے آکھیا کہ کسی دور دے ہیرو نوں جانچن لئی لوکاں کولوں رائے لینا ضروری نہیں بلکہ دل دی گواہی ای کافی ہوندی اے۔ میں جدوں پنجابی تحریک دا حصہ بنیا تے مینوں ایتھے سب توں نمایاں شخص الیاس گھمن ای نظر آئے۔ اوہناں دا ہور آکھنا سی کہ زمانہ جدوں صوفیاں توں پاک ہو گیا تے زمانہ ختم ہو جاوے گا۔ صوفیاںدی علامت ایہہ اے کہ اوہ نیکی کر کے جتاندا نہیں اوہنوں کسی تعریف دی خواہش نہیں ہوندی۔ اللہ دے نیک بندے دی اک ہور خوبی ایہہ وی ہوندی اے کہ اوہ اللہ دے بندیاں توں لیندا نہیں دیندا اے۔ الیاس گھمن نے جیویں پنجابی زبان تے دھرتی دی خدمت دی اپنی جیب توں خرچ کر کے ایس بوٹے نوں پانی دتا۔ ایہہ اج دے پنجاب دا شملہ نیں جہڑا ہمیشہ اُچا رہوے گا۔میاں ظفر مقبول نے آکھیا تنویر بخاری ہر مشاعرے وچ شعر پڑھدے نیں ”گالھاں کڈ دی اے مندا بولدی اے دند بھندی اے’ کھرالیندی اے امتحان دنیا’ فیر مندی اے” الیاس گھمن نے اپنی پوری زندگی پنجابی لئی وقف کردتی۔ اوہناں دی پنجابی خدمات دے مقابلے وچ کسی نوں کھڑآ نہیں کیتا جا سکدا۔ اوہناں دا سب توں وڈا کم سائنس تے ٹیکنالوجی دے علم نوں پنجابی وچ ٹرانسلیٹ کرنا سی’ اوہناں نوں سالگرہ دی بہت مبارک۔جاوید پنچھی نے آکھیا کہ میرا پنجابی لئی جہڑا عشق اے اوہدے پچھے تنویر بخاری تے الیاس گھمن دا ہتھ اے۔ جے گھمن صاحب نہ ہوندے تے میں اپنے حالات دی وجہ نال پنجابی لکھنا چھڈ دیندا لیکن اوس ویلے میرا ساتھ دین والے الیاس گھمن صاحب سن۔ میں سمجھنا واں پنجابی نوں زندہ رکھن لئی اوہناں دا کم بہت وڈا اے۔ اللہ اوہناں نوں سلامت رکھے۔عقیل شافی نے آکھیا کہ مینوں پنجابی تحریک وچ لیان والے ای الیاس گھمن سن۔ میں اوہناں نوں سالگرہ دے موقعے اتے ڈھیر دعاواں پیش کرنا واں۔ اشرف سہیل دا آکھنا سی کہ میرا تے گھمن صاحب دا ساتھ تقریباً 40ورھیاں دا اے۔ اوہناں دے اندر جہڑی پنجابی دی خدمت دا جنون سی اوہ مینوں اوہناں کولوں ملیا۔ اوہناں دی دین اے کہ پکھیرو اینے لمے عرصے توں کڈ رہیا واں۔ مینوں اوہناں کولوں جہنی محبت ملی میں ہمیشہ مقروض رہواں گا۔ اوہناں دا رسالہ رویل چھپدا سی جہدے وچ میں بچیاں لئی لکھدا سی۔میاں آصف علی نے آکھیا کہ الیاس گھمن نے پنجابی دی خدمت دا کم جہڑے دور وچ کیتا اوہ بہت ای اوکھا ویلا سی۔ جدوں پنجابی دا نام لینا وی گناہ سمجھیا جاندا سی۔ اوہناں دا جہنا ں کم اے کوئی ہور اوہناں دے کول نہیں پہنچ سکدا۔ فاروق ندیم نے الیاس گھمن دی خدمات نوں خراج تحسین پیش کرن لئی اپنا لکھیا ہویا مضمون پڑھ کے سنایا تے اوہناں نوں سالگرہ دی مبارکباد دتی۔ ڈاکٹر بشیر فیض اسدی دا آکھنا سی کہ گھمن صاحب پنجابیاں دا مان نیں’ اللہ اوہناں نوں سلامت رکھے ‘ ایہناں نال ای بہاراں نیں۔ زاہد حسن نے آکھیا کہ پنجابی زبان و ادب تے دھرتی لئی کم کرن والے سارے لوکاں دا اتفاق اے کہ الیاس گھمن نے جہنا کم کیتا اے پنجابی تے پنجاب لئی کسے ہور نے نہیں کیتا۔ اوہناں نے جیلاں وی کٹیاں۔ اوہناں نے پنجابی لئی جہڑے دور وچ کم کیتا اوہ بہت اوکھا ویلا سی۔ اینا عرصہ اوہناں دے نال گزاریا اے ۔ اوہناں کولوں پنجابی لکھن دا شوق پیدا ہویا۔ اج تے پنجابی لئی کم کرنا بہت آسان ہو گیا اے۔ ایہہ سب الیاس گھمن جئے لوکاں دی دین اے۔ڈاکٹر اظہار احمد گلزار نے آکھیا کہ مینوں ہمیشہ اوہناں نے پنجابی لکھن لئی حوصلہ دتا تے جے اج کجھ پنجابی لکھنا واں ایہہ اوہناں دی دین اے۔ الیاس گھمن اک شخصیت نہیں ایہہ اک ادارہ تے اک سکول آف تھاٹ دا نام اے۔ اوہناں نے ایس شعر دے نال اوہناں نوں خراج عقدیت پیش کیتا ”رکے تو چاند’ چلے تو ہوائوں جیسا ہے ،یہ شخص دھوپ میں بھی چھائوں جیسا ہے”الیاس گھمن نے آکھیا کہ میں مشکور آں سارے دوستاں دا جہڑے آئے تے سب توں ودھ مدثر اقبال بٹ صاحب تے اوہناں دی پوری ٹیم دا کہ اوہناں نے ایس پروگرام دا پربندھ کیتا۔ میں اپنی تحریک دے ساتھیاں دا ذکر کراں گا کہ اوہناں سارے دوستاں نے مینوں حوصلہ دتا۔ اوہناں دی محبت ویکھ کے دل خوش ہو جاندا اے۔ ساڈی زندگی دا مقصد ای پنجابی زبان نوں اپنا مقام دوانا اے۔ بٹ صاحب دے نال رل کے اجے 2سال پہلاں اک وڈی کامیابی ملی کہ پنجاب کلچر ڈے منوایا گیا۔ ایس موقعے تے ہن سرکاری افسر پنجابی پگ پا کے سوشل میڈیا اتے شیئر کردے نیں جہدے توں عام بندے نوں وی تحریک ملدی اے تے اوہ اپنے کلچر تے زبان ول پَرت رہیا اے۔ پروگرام دے اختتام تے کیک کٹیا گیا تے شرکا لئی پرتکلف چاہ داپربندھ کیتا گیا۔