جیل بھرو تحریک:فیاض چوہان، زلفی بخاری سنے100 کارکناں گرفتاری دے دتی

پنڈی(پنجابی میڈیا)پنڈی وچ جیل بھرو تحریک دے سلسلے وچ پی ٹی آئی دے رہنماواں فیاض الحسن چوہان ،زلفی بخاری، صداقت عباسی ، وحید قاسم تے اعجاز خان جازی سنے100 توں وَدھ کارکناں گرفتاری دے دتی۔فیاض الحسن چوہان ریلی دی صورت کمیٹی چوک پہنچے، جیل بھرو تحریک دے سلسلے وچ پی ٹی آئی دے رہنما ازخود قیدیاں دی وین وچ جا کے بیٹھ گئے۔فیاض الحسن چوہان نے قیدی وین وچ میڈیا نال گل بات کردیاں آکھیا کہ میں گھر والیاں نوں آکھیا اے کہ میری ضمانت نہ کرانا، نہ اسیں ضمانتاں کراواں گے نہ ہی درخواستاں دیاں گے۔فیاض چوہان دے آن دے بعد کمیٹی چوک اُتے پی ٹی آئی کارکن وی قیدی وین وچ بیٹھن لگے، فیاض الحسن چوہان نال ہور10پی ٹی آئی کارکناں وی گرفتاری دتی ۔پلس فیاض الحسن چوہان تے پی ٹی آئی کارکناں نوں کمیٹی چوک توں پہلاں قیدی وین وچ لے کے روانہ ہوگئی۔فیاض چوہان دی گرفتاری توں سابق وزیرِ داخلہ شیخ رشید، پی ٹی آئی رہنما زلفی بخاری، مجلس وحدت مسلمین دے سربراہ علامہ ناصر عباس تے عامر کیانی وی گرفتاری دین کمیٹی چوک پہنچے گئے، پی ٹی آئی رہنما زلفی بخاری، علامہ ناصر عباس نے گرفتاری دے دتی جدکہ شیخ رشید گرفتاری دین دی بجائے کمیٹی چوک توں گڈی وچ روانہ ہو گئے۔پلس ذرائع دے مطابق3قیدی ویناں وچ وَدھ توںوَدھ90افراددی گنجائش موجود سی، پلس دا کہنا اے کہ جیل بھرو تحریک تحت ہُن تک فیاض الحسن چوہان، صداقت عباسی، زلفی بخاری، علامہ راجہ ناصر عباس نے رضاکارانہ طوراُتے گرفتاریاں دتیاں۔گرفتاریاں دین والیاں وچ لطاسب ستی، وحید قاسم، اعجاز خان جازی وی شامل نیں جدکہ شیخ رشید، شیخ راشد شفیق، راجہ راشد حفیظ، عامر محمود کیانی، واثق قیوم عباسی گرفتاری دتیوں بغیر روانہ ہو گئے، جیل بھرو تحریک وچ ہُن تک رضاکارانہ طور اُتے100 دے نیڑے کارکناں گرفتاری دتی اے۔